Viza nədir?

Viza müraciəti zamanı səfərin məqsədi əsas rol oynayır. Turist olaraq viza istirahət və qısa müddətli səyahət üçün nəzərdə tutulur. İş vizası xarici şirkətdə işləmək üçün tələb olunur. Təhsil vizası isə universitet və ya hərhansı kurs proqramlarında oxumaq məqsədilə verilir. Hər bir viza növü üçün toplanacaq sənədlər və baxılma müddəti fərqlidir. Səfər məqsədini düzgün göstərməmək vizaya rədd cavabı gəlməsinə səbəb ola bilər.

Azərbaycan vətəndaşları bəzi ölkələrə vizasız səyahət edə bilirlər. Lakin Avropa ölkələrinin böyük əksəriyyəti üçün əvvəlcədən viza almaq tələb olunur. Xüsusilə Şengen ölkələrinə daxil olan dövlətlər üçün Şengen vizası lazımdır. Buna görə səyahət planlaşdırarkən həm viza tələb etməyən, həm də tələb edən ölkələri əvvəlcədən araşdırmaq vacibdir.

Şengen zonası Avropada sərhədsiz hərəkəti təmin edən ölkələr birliyidir. Şengen vizası ilə bu əraziyə daxil olan ölkələrə səyahət etmək mümkündür. Lakin əgər səyahət üçün Şengen vizası alırsınızsa sizə 180 gün ərzində maksimum 90 gün qalmaq icazəsi verilir. Bu qaydanın pozulması gələcək viza müraciətlərinə mənfi təsir göstərə bilər. Şengen vizası haqqında daha ətraflı məlumat üçün öncədən yazdığımız bloqumuza keçid edə bilərsiniz.

Elektron viza onlayn platforma üzərindən müraciət edilən və elektron formada təqdim olunan icazədir. E-viza üçün səfirliyə getmək tələb olunmur. Müraciət forması doldurulur, ödəniş edilir və təsdiq e-poçt vasitəsilə göndərilir. Bu sistem xüsusilə qısamüddətli turist olaraq edəcəyiniz səfərlər üçün rahatdır və vaxt baxımından daha sərfəlidir.

"ASAN Viza" Azərbaycana səfər etmək istəyən əcnəbilər üçün nəzərdə tutulan rəqəmsallaşmış viza növüdür. "ASAN Viza" sistemi vasitəsilə müraciətlər ASAN Xidmət tərəfindən idarə olunur və cəmi 3 iş günü ərzində yekunlaşır. Yəni cəmi 3 iş günü ərzində 30 günədək qalma imkanı verən birdəfəlik və ya 90 günədək etibarlı olan çoxdəfəlik elektron vizanı asanlıqla əldə etmək mümkündür. Bu viza növü haqqında ətraflı məlumat üçün ASAN Viza ilə bağlı yazdığımız bloqa keçid edə bilərsiniz.

Turizm vizası adətən qısamüddətli olur və 15 gündən 90 günədək qalmaq imkanı verir. Bu viza ilə işləmək hüququ yoxdur. Otel rezervasiyası, aviabilet bronu və maliyyə təminatı turist vizası üçün əsas sənədlərdir.

Milli viza (D kateqoriya) uzunmüddətli qalmaq istəyən şəxslər üçün verilir. Bu, təhsil, iş və ya daimi yaşayış məqsədli ola bilər. Milli viza daha geniş sənəd paketi və bəzən müsahibə tələb edir. Hər ölkə üçün milli vizanın tələb etdiyi sənədlər siyahısı fərqli ola bilər. Bu səbəbdən gediləcək ölkə dəqiqləşdirildikdən sonra viza üçün sənədlər siyahısını öyrənmək lazımdır.

Elektron viza üçün müraciət tam onlayn aparılır. Konsulluqdan viza almaq üçün görüş təyin edilir. Konsulluqdan almaq üçün sənədlər fiziki şəkildə təqdim edilir və bəzən müsahibə keçirilir. Konsulluq prosesi daha uzun çəkə bilər.

Viza rüsumu ölkəyə görə dəyişir. Şengen vizası üçün adətən standart rüsum tətbiq olunur. Baxılma müddəti isə 5 iş günündən bir neçə həftəyədək dəyişə bilər. Mövsümi sıxlıq müddətə təsir göstərə bilər.