Oğuzda gəzməli yerlər

Yuxarı məhəllə sinaqoqu Oğuzun əsas yəhudi abidələrindən biridir. Məlumatlara görə, bina 1897-ci ildə yerli yəhudi icmasının hesabına inşa olunub. Sovet dövründə digər ibadət ocaqları kimi bu sinaqoq da bağlanmış və sonradan anbar kimi istifadə olunmuşdur. Sinaqoq 2004–2006-cı illərdə bərpa edildi və yenidən fəaliyyətə başladı. Hazırda tarixi məkanlardan biri olan sinaqoq ibadətgah kimi fəaliyyət göstərir.

Aşağı məhəllə sinaqoqu 1849-cu ildə inşa edilib. Bu sinaqoq yerli yəhudilər tərəfindən 1992–1994-cü illərdə təmir edilmişdir. Bir əsrdən artıq vaxt keçməsinə baxmayaraq, inşa zamanı istifadə olunmuş dirəklər bu günədək qorunub saxlanılmışdır.

Bölgənin qədim dövründən bu günədək olan tarixini özündə əks etdirən arxeoloji tapıntılar, sənət əsərləri, soyuq silahlar, heykəltəraşlıq və misgərlik nümunələri muzeydə sərgilənir. Xış, kotan, göndən hazırlanmış xəlbir, nehrə və s. əşyalar hələ qədim zamanlardan yerlilərin əkinçilik və maldarlıqla məşğul olduqlarını göstərir.

Oğuz udilərinin ibadətgahı sayılan Müqəddəs Yelisey adına alban kilsəsi isə Oğuzun cənub-şərqində yerləşir. Bu abidə xristian kilsəsinin müqəddəslərindən biri olan Yeliseyin şərəfinə inşa edilmiş, alban tayfalarından olan yerli udilərin ibadət ocağı olmuşdur. Bu gün isə bu abidə keçmişin izlərini özündə daşıyır və Oğuzun simvollarından biri hesab edilir.

Muxas qülləsi Oğuz rayonunda, Muxas kəndinin şimalında, Daşağıl keçidinin yaxınlığında yerləşir. Qüllənin hündürlüyü təxminən 11–12 metrdir. Oğuzun qədim tarixinin bir parçası olan tikilinin giriş qapısı yer səviyyəsində deyil. Bu da qüllənin müdafiə məqsədli tikili olmasına ehtimal edilir.

VII əsrə aid olan Gavurqala qülləsi bölgənin ən qədim müdafiə tikililərindən sayılır. Qaya üzərində yerləşdiyindən ətraf mənzərəni geniş şəkildə görmək mümkündür. Bununla da tikilinin keçmişdə stratejik əhəmiyyətə malik olduğunu düşünmək olar.

Çay daşlarından inşa edilən bu qüllə həm memarlıq üslubu, həm də müdafiə məqsədli quruluşu ilə seçilir. Qala ərazisində aparılmış arxeoloji qazıntılar zamanı məişətdə istifadə olunan əşya nümunələri, o cümlədən Surxay xanın adı yazılmış mis cam tapılmışdır. Oğuza ziyarət zamanı Surxayxan qalası mütləq görülməli yerlər siyahısındadır.

Xalxal şəlaləsi Oğuz rayonunun ən məşhur və ziyarət edilən məkanlarından biridir. Sıx meşə zolağı, qayalıqlar və şəlalənin aşağısında yer alan kiçik gölməçə buranı xüsusilə yayda ideal istirahət nöqtəsinə çevirir. Şəlalə piknik, təbiət gəzintisi və fotoçəkiliş üçün əlverişli məkandır. Ziyarət etməzdən əvvəl uyğun geyim və ayaqqabı seçimi etməyiniz tövsiyə olunur.

Baş Daşağıl şəlaləsi, Azərbaycanın Oğuz rayonunun Baş Daşağıl kəndində yerləşən təbii gözəlliklərdən biridir. Bu şəlalə, dağlıq və meşəlik ərazidə yerləşir. Şəlalənin ətrafında bulaqlar və mağaralar mövcuddur. Şəlaləyə aparan yol meşəlik və dağlıq ərazidən keçdiyi üçün, rahat ayaqqabı geyinmək və ehtiyatlı olmaq tövsiyə olunur.