Gəncədə gəzməli yerlər

Bu türbə Gəncənin son xanı olan Cavad xanın xatirəsini əbədiləşdirmək üçün onun məzarı üzərində tikilmişdir. Arran memarlıq üslubunda inşa edilmiş dördkünc formada olan türbə bişmiş qırmızı kərpicdəndir. Abidənin tağvari bir giriş qapısı və rəngli şüşələrlə bəzədilmiş üç pəncərəsi var.

Azərbaycanın dahi şairi Nizami Gəncəviyə həsr olunmuş bu abidə Gəncənin simvollarından biridir. Möhtəşəm memarlığı və geniş park kompleksi ilə əhatə olunmuş məqbərə əsrlərin poeziya irsini yaşadır. Burada ziyarətçilər Nizaminin həyatına dair eksponatlarla tanış ola bilərlər.

Orta əsr Azərbaycan abidələri sırasında nadir tikililərdən sayılan Şah Abbas karvansarayı Gəncəyə gələn səyahətçilərin ziyarət etdiyi məkanlardandır. Burada o dövrün memarlıq üslubu qorunub saxlanılmışdır. İndi karvansaray mədəni tədbirlər və sərgilər üçün istifadə olunur.

Tarixi əhəmiyyətinə görə Gəncənin memarlıq abidələrindən fərqlənməyən tikililərdən biri də şəhər sakinləri və turistlərin butulkalı ev kimi tanıdığı yaşayış binasıdır. Binanın birinci mərtəbəsi 1952-ci ildə çay daşı və bişmiş qırmızı kərpicdən inşa olunub. İkinci mərtəbəsinin inşasında 43 min 800 ədəd müxtəlif ölçülü və rəngli butulkadan, Qara dəniz sahillərindən toplanılan balıqqulaqlarından, Soçi şəhərindən gətirilən xırda rəngli daşlardan, əlvan şüşələrdən və kiçik güzgülərdən istifadə edilib. Gəncə şəhər sakini İbrahim Cəfərov bu evi Böyük Vətən Müharibəsində iştirak edərək itkin düşən qardaşı Yusifin xatirəsini əbədiləşdirmək üçün tikib.

Aleksandr Nevski adına Rus-Pravoslav Kilsəsi 1887-ci ildə Bizans üslubunda plint kərpicdən inşa edilib. Kilsə həm yerli pravoslavların, həm də müsəlmanların xeyriyyə vəsaiti hesabına tikilib. Rus pravoslav memarlığının nümunəsi olan bu kilsə Gəncəyə ziyarət edənlərin ən çox görmək istədiyi tikililər arasında yer alır.

Gəncənin qədim tarixi-memarlıq abidələrindən olan “İmamzadə” dini kompleksi bu gün yerli əhali və şəhərin qonaqları tərəfindən ən çox ziyarət edilən məkanlardan biridir. Türbənin tovuz quşunun əksi və çiçək naxışları ilə bəzədilmiş göy kirəmitli möhtəşəm günbəzi xüsusilə diqqət çəkir.

Gəncədən 40 km məsafədə yerləşən Göygöl təbiət həvəskarlarının sevimli məkanıdır. Dağ və meşələrlə əhatə olunan bu mavi göl öz şəffaf suları və sakit atmosferi ilə tanınır. Hər il minlərlə səyahətçi təbiətin incisi olan bu gölü görmək üçün bura üz tutur.

Göygöl Milli Parkının yaxınlığında yerləşən Maralgöl təbiətin başqa bir incəsidir. Gölün ətrafı sıx meşələrlə örtülüb və buraya gələnlər təbiətin səssizliyində rahatlıq tapır. Gün batımında Maralgöl mənzərəsi fotoqraflar üçün əsl möcüzədir.

Xan bağı Qafqazın ən qədim parklarından biridir. Hazırda 3 hektarlıq ərazini əhatə edən Xan bağı müxtəlif növ bitki və ağac növləri ilə zəngindir. Bu bağ ilin bütün fəsillərində gözəldir. Gün ərzində bu bağda insanların çoxluğuna baxmayaraq, sakitlik hökm sürür.

Gəncənin ərazisində sahəsi 450 hektar olan Heydər Əliyev adına park kompleksi dünyanın ən böyük beş parkından biridir. Ərazidə gəzinti yolları, fəvvarələr, süni göl yerləşir. Park ailəvi istirahət və açıq hava tədbirləri üçün mükəmməl seçimdir.

Gəncənin ən böyük ticarət və əyləncə mərkəzi olan “Gəncə Mall” həm yerli, həm də xarici brendləri bir araya gətirir. Burada alış-verişlə yanaşı, kinoteatr, restoranlar və ailəvi əyləncə zonaları da fəaliyyət göstərir.

“Xəmsə Park” ticarət mərkəzi Gəncənin müasir alış-veriş və əyləncə məkanlarından biridir. Burada həm yerli, həm də beynəlxalq brendlərin mağazaları, kafelər və ailəvi istirahət üçün zonalar mövcuddur. “Xəmsə Park” ticarət mərkəzi alış-verişlə yanaşı, xoş zaman keçirmək istəyən sakinlərin və turistlərin ideal məkanlarındandır.