Milanda görməli yerlər və səyahət planı
Milan İtaliyanın moda və incəsənət paytaxtı kimi tanınır. Bu şəhər təkcə dəbli butikləri və möhtəşəm alış-veriş küçələri ilə deyil, həm də tarixi abidələri, incəsənət muzeyləri və dünya şöhrətli mətbəxi ilə səyyahları özünə cəlb edir. Səyahət planınızı daha rahat və unudulmaz etmək üçün Milanda görməli yerləri, əyləncə seçimlərini, yerli mətbəxi və alış-veriş imkanları haqqında məlumatları paylaşırıq.
Table of Contents
Milanda görməli yerlər
Milan müasir həyat tərzi və mədəniyyəti ilə də fərqlənir. Şəhər zəngin memarlıq abidələri, incəsənət muzeyləri və geniş meydanları ilə turistlərin diqqətini çəkir. Burada Leonardo da Vinçinin şah əsərləri ilə tanış olmaq, məşhur Duomo Katedralinə heyran qalmaq və küçələrində gəzərək Milanın ecazkar atmosferini hiss etmək mümkündür.
Milan kafedralı (Duomo di Milano)
Milanda ilk ziyarət edilməli yerlərdən biri şəhərin simvolu olan Milan kafedralıdır. Qotik üslubda inşa edilən bu möhtəşəm tikili İtaliyanın ən böyük kilsələrindən biri hesab olunur. Kafedralın fasadı heyrətamiz dərəcədə detallı oyma daşlarla bəzədilib, içəridə isə nəhəng pəncərələr və tarixi freskalar göz oxşayır. Kafedralın damına qalxaraq şəhərin panoramik mənzərəsini izləmək mümkündür.
II Vittorio Emanuele qalereyası
Duomo meydanının yanında yerləşən bu tarixi alış-veriş qalereyası dünyanın ən qədim ticarət mərkəzlərindən biri sayılır. 19-cu əsrin sonlarında tikilmiş II Vittorio Emanuele qalereyası təkcə lüks mağazaları ilə deyil, həm də şüşə örtüklü damı və zərif memarlığı ilə diqqət çəkir. Burada dünyaca məşhur brendlərin mağazaları, eksklüziv restoranlar və tarixi kafelər yerləşir.
La Skala opera teatrı
Dünya opera sənətinin ən nüfuzlu səhnələrindən biri sayılan La Skala opera teatrı 1778-ci ildən bəri fəaliyyət göstərir. Burada Puççini, Verdi və digər məşhur bəstəkarların əsərləri səhnəyə qoyulub. Əgər Milanda olarkən opera izləmək istəyirsinizsə, biletləri əvvəlcədən əldə etməyiniz tövsiyə olunur.
Sforza qalası və parkı
Milanda tarixə şahidlik etmək üçün Sforza qalasını ziyarət etmək mütləqdir. Bu qala XIV əsrdə inşa edilib və uzun müddət Milan hersoqlarının iqamətgahı olub. Hal-hazırda qala içərisində müxtəlif muzeylər fəaliyyət göstərir. Qalanın yaxınlığında geniş və yaşıllıqla örtülmüş Sempion parkı yerləşir, burada dincəlmək və təbiətdən həzz almaq mümkündür.
Santa Mariya della Qrasiya
Santa Mariya della Qrasiya — İtaliyanın Milan şəhərində yerləşən bir kilsədir. İlk əvvəl monastır yeməkxanası kimi tikilməsi planlaşdırılan bu kilsə UNESCO-nun Ümumdünya irsi siyahısına daxil edilmişdir. Kilsənin yeməkxanasının arxa divarını Leonardo da Vinçinin Sonuncu şam yeməyi freskası bəzəyir.
Milanda istirahət və əyləncə
Milan təkcə tarixi və mədəni zənginliyi ilə deyil, həm də əyləncə imkanları ilə seçilir. Şəhərin gecə klubları, caz barları və klassik musiqi konsertləri ilə dolu bir gecə həyatı var. Burada kanalların kənarında yerləşən restoran və barlarda axşam yeməyindən sonra canlı musiqi dinləmək mümkündür. Şəhər ilin müxtəlif dövrlərində festivallara da ev sahibliyi edir. Milan Moda Həftəsi dünyanın ən nüfuzlu moda tədbirlərindən biri kimi tanınır və bu tədbir zamanı şəhər dünyanın hər yerindən gələn dizaynerlər və modelyerlərlə dolur. Bundan əlavə, Musica e Natura festivalı və Milano Film Festivalı kimi tədbirlər də şəhərdə mədəniyyət və sənət həyatına rəng qatır.
Milanda yeməklər
İtalyan mətbəxi dünyada ən çox sevilən mətbəxlərdən biridir və Milan bu ləzzətləri dadmaq üçün ideal şəhərlərdən biridir. Milana gələn hər bir qonaq mütləq Risotto alla Milanese yeməyini sınamalıdır. Bu yemək zəfəranlı düyü ilə hazırlanır və xüsusi qaymaqlı dadı ilə məşhurdur. Ət sevənlər üçün Milanın ənənəvi yeməklərindən biri Ossobuco alla Milanese hesab olunur.
Milanda səhər yeməyi üçün ən məşhur seçim Panettone desertidir. Bu yüngül və meyvəli keks Milanda ənənəvi olaraq Milad bayramında yeyilsə də, şəhərin bir çox kafelərində ilin istənilən vaxtında tapmaq mümkündür.
Milanda alış-veriş imkanları
Milan modanın qəlbi hesab olunur və alış-veriş üçün ən yaxşı Avropa şəhərlərindən biridir. Şəhərdə hər büdcəyə uyğun mağazalar və bazarlar mövcuddur. Əgər münasib qiymətə alış-veriş etmək istəyirsinizsə, Corso Buenos Aires və Corso Vittorio Emanuele II küçələrində yerləşən mağazaları ziyarət edə bilərsiniz.
Səyahətdən öncə bilməli olduğunuz vacib məqamlar
Milana səyahət etməzdən əvvəl nəzərə alınmalı bir neçə vacib məqam var. Azərbaycan vətəndaşları üçün Şengen vizası tələb olunur, buna görə səyahətdən əvvəl viza müraciətini erkən etmək vacibdir. Şəhərdə hava mövsümə görə dəyişir, yay aylarında isti, qışda isə sərin ola bilər, ona görə də geyim seçiminizi buna uyğun tənzimləmək tövsiyə olunur. Milanın nəqliyyat sistemi olduqca inkişaf edib. Şəhərdə metro, tramvay və avtobuslar rahat və sərfəli nəqliyyat seçimləridir. Ödəniş üçün bank kartları keçərlidir. Xoş səyahət arzulayırıq!
Müəllif
Oxşar məqalələr
Parisdə görməli yerlər və səyahət planı
Daha çoxParisdə görməli yerlər və tarixi abidələr haqqında oxuyun. Səyahətinizi daha rahat və unudulmaz etmək üçün hazırladığımız səyahət planından yararlanın!
Barselonada görməli yerlər və səyahət planı
Daha çoxBarselona memarlıq inciləri, tarix və mədəniyyət dəyərləri ilə Avropanın ən cəlb edici turistik istiqamətlərindən biridir. Dəniz sahili boyunca uzanan bu fövqəladə gözəl şəhər Antoni Qaudinin memarlıq abidələri, görkəmli parkları və tarixi məhəllələri ilə hər bir səyahətçini valeh edir. Bu bələdcidə Barselonada görməli yerlər, istirahət, əyləncə və səyahətinizin daha maraqlı olması üçün faydalı məlumatlarla tanış olacaqsınız.
Londonda görməli yerlər və səyahət planı
Daha çoxLondona səyahət etməyi planlaşdırırsınız? Azərbaycan Hava Yolları ilə rahat uçuş və Londonda kəşf edəcəyiniz unudulmaz yerlər haqqında məlumat əldə edin!
İstanbulda görməli yerlər və səyahət planı
Daha çoxİstanbulda görməli yerlər, əyləncə, mətbəx və alış-veriş imkanları haqqında hər şey burada! Tarixi keçmişi və təbii gözəllikləri, dinamik gecə həyatı və zəngin mədəni tədbirləri ilə turistləri valeh edən İstanbul, bir an belə boş qalmayacağınız bir şəhərdir.