Maledə gəzməli yerlər və səyahət planı

Maldiv Respublikasının paytaxtı olan Male, okeanın mavi tonları, tropik ab-havası və rəngarəng mədəni həyatı ilə səyahətçiləri özünə cəlb edən ekzotik şəhərdir. Şəhərin tarixi hissəsində qədim məscidlər, krallıq dövrünə aid abidələr, eləcə də müasir tikililər ziyarətçiləri qarşılayır. Aşağıda Male səfəriniz zamanı gəzə biləcəyiniz yerləri sizə təqdim edirik.

Maldivlərin paytaxtı Male dəniz mənzərələri və ekzotik atmosferi ilə səyahətçilərə fərqli bir istirahət təcrübəsi təqdim edir. Gün ərzində okean sahilində gəzə, axşam isə dənizkənarı restoranlarda istirahət edə bilərsiniz. Şəhərdəki spa mərkəzləri tropik yağlarla masaj və bədən baxımı təklif edir. Həmçinin, dənizkənarı bulvar boyu yerləşən kafelər gün batımını izləmək üçün mükəmməl məkandır.

Male mətbəxi balıq, kokos və ədviyyatlarla zəngindir. Şəhərin restoranlarında ənənəvi Maldiv yeməklərindən Mas Huni (tuna, kokos və soğanla hazırlanan salat), Garudhiya (balıq şorbası) və Rihaakuru (balıq pastası) kimi dadlı təamları sınaya bilərsiniz. Həmçinin, şəhərdə Asiya və Avropa mətbəxindən təamlar təklif edən restoranlar da geniş yayılıb. Burada dəniz məhsullarının təzə və bol olması hər yeməyi xüsusi edir.

Male şəhəri yalnız təbii gözəllikləri ilə deyil, həm də alış-veriş imkanları ilə turistlər üçün cəlbedici məkanlardan biridir. Şəhərdə Majeedhee Magu və Hulhumale Market kimi bazarlarda yerli və beynəlxalq məhsulları tapa bilərsiniz. Turistlər üçün diqqətçəkən məhsullar, təzə dəniz məhsulları, tropik meyvələr və əl işi suvenirlərdir. Həmçinin şəhərin kiçik dükanlarında və butiklərində yerli sənətkarlıq nümunələrindən xatirə əşyalar almaq mümkündür.

Yerli sakinlərin adətən üstünlük verdiyi nəqliyyat növü velosiped və ya motosikletlərdir. Male şəhəri çox kiçik olduğu üçün əksər yerlərə piyada getmək mümkündür. Şəhərdə əsas nəqliyyat vasitəsi isə taksilərdir. Gediləcək məsafənin uzunluğundan asılı olaraq taksi qiymətləri dəyişir. Qısa məsafələr üçün təxmini ödəniş 25-30 MVR (təxminən 1.5-2 dollar) təşkil edir. Ödəniş adətən nağd şəkildə edilir.

Tropik iqlimi olan şəhərdə hava musson yağışlarının təsiri ilə noyabrdan martadək quru, iyundan avqustadək isə yağışlı keçir. İlboyu isti hava hökm sürür. Havanın temperaturu təxmini +25-30, suyun temperaturu isə +25-33 dərəcə arasında dəyişir. Bu şəhərə daha çox noyabr – aprel ayları aralığında səyahət edilir.

Maleyə səfər etməzdən əvvəl bilməli olduğunuz bir neçə faydalı məlumat var. Bu şəhərə səyahət etməzdən əvvəl viza tələblərini yoxlamaq vacibdir. Şəhərdə istifadə edilən valyuta Maldiv rufiyası (MVR) olsa da, dollar da qəbul edilir. Maldiv Respublikasında dövlət dili dhivehi dilidir. Lakin ingilis dili də geniş yayılıb. Bundan əlavə turistlərin öncədən bilməli olduğu bir fakt da var ki, yalnız Maleyə deyil həm də, Maldivə daxil olarkən ölkəyə spirtli içki, donuz əti gətirmək qadağandır. Turistlər içkini restoran, kafe və otellərdə içə bilərlər.