İstanbulda görməli yerlər və səyahət planı

İstanbulun simvollarından sayılan və şəhərin demək olar ki, hər tanıtımında yer alan Qız Qalası və Qalata Qülləsi mütləq görməli yerlərdəndir. Bosfor boğazının ortasında yerləşən Qız Qalası əsrlər boyu həbsxana, radio stansiyası, mayak, karantin mərkəzi və gömrük nəzarət məntəqəsi kimi istifadə olunmuş, hazırda isə şəhərin ən prestijli restoranlarından biri kimi xidmət göstərir.Bizans dövründə inşa edilən Qalata Qülləsi, İstanbulun mərkəzində tarixi ab-havası ilə diqqət çəkir. Bir vaxtlar mayak kimi istifadə edilən bu qüllə yanğınlar nəticəsində zərər görmüş və sonuncu dəfə 1967-ci ildə bərpa edilərək turistlərin ziyarətinə açılmışdır.

İndiyə qədər qorunub saxlanılan saraylar arasında dünyanın ən qədim və ən böyük sarayı ünvanına sahib olan Topqapı Sarayı 400 il boyunca Osmanlı imperiyasının idarəetmə və iqamətgah mərkəzi olmuşdur. Memarlıq üslubu, arxiv sənədi və nadir kolleksiyaları ilə saray yerli və xarici turistlərin böyük marağına səbəb olur.Dolmabağça Sarayı isə Osmanlı imperiyasının əzəmətini nümayiş etdirmək məqsədilə tikilmişdir. Bu sarayın ən önəmli cəhətlərindən biri də odur ki, Mustafa Kamal Atatürk 10 noyabr 1938-ci ildə məhz burada vəfat etmişdir. Saray hər gün 09:00-16:00 saatlarında ziyarətçiləri qəbul edir.

İstanbulda 100-dən çox muzey mövcuddur və hər biri özünəməxsus tarixi izlər daşıyır. Şəhərin ən çox ziyarət edilən muzeyləri arasında Ayasofya Məscidi, İstanbul Arxeologiya Muzeyi, Topqapı Sarayı Muzeyi, Dolmabağça Sarayı Muzeyi, Rahmi Koç Muzeyi və İstanbul Oyuncaq Muzeyi xüsusi yer tutur. Bu muzeylər İstanbulun zəngin tarixini, Osmanlı mirasını, arxeoloji tapıntıları və maraqlı tematik eksponatları ilə ziyarətçilərə unudulmaz təcrübə yaşadır.

İstanbul Türkiyədə ən çox məscidə sahib şəhərdir. Bu məscidlər arasında mütləq ziyarət edilməli olanlar Sultanəhməd Məscidi və Süleymaniyyə Məscididir.Sultanəhməd Məscidi, 6 minarəsi və daxili divarlarını bəzəyən çiniləri ilə Osmanlı memarlığının ən möhtəşəm əsərlərindən biridir.Süleymaniyyə Məscidi isə Mimar Sinanın şah əsəri hesab olunur. Bu kompleks yalnız ibadət yeri olmayıb, həm də içərisində mədrəsə, xəstəxana, külliyyə, hamam, kitabxana və dükanlar yerləşdiyi üçün keçmişdə ictimai xidmət mərkəzi rolunu oynayıb.

Qədim dövrlərdən bəri İstanbul qədər məşhur olan adalar da bu şəhərin ayrılmaz hissəsidir. Sedefadası, Sivriada, Yassıada, Qaşıq Adası və Dovşan Adasında daimi yaşayış yoxdur.Lakin Böyükada, Heybəliada, Burgazada və Kınalıada turistlərin böyük maraq göstərdiyi məkanlardandır. Adalara yalnız vapurla gedilir və orada nəqliyyat velosiped və faytonlarla təmin olunur.Adaların yaşıllıqları arasında dincəlmək, tarixi binaları və köhnə İstanbul evlərini kəşf etmək üçün mükəmməl bir fürsətdir.